EJIE S.A., Eusko Jaurlaritzaren Informatika Elkartea

Kalitate-politika

EJIEko zuzendaritzaren helburu nagusia bezeroen gogobetetasuna lortzea da, ezarri diren kontratuko errekerimenduekin eta eraginkortasun-irizpideekin bat etorriz. Egindako lan-motagatik, esan daiteke helburu hori modu bakar batean lor daitekeela: EJIEko langileek lan hori egiten jakinda, egiteko gogoa izanda eta beharrezko lan-metodoak eta baliabide teknikoak eskura edukita.

Politika hori gauzatzeko, EJIEko zuzendaritzak honako konpromisoak hartu ditu:

• Enpresa modu eraginkorrean zuzentzea eta, horretarako, prozesu guztiak etengabe hobetzea, une oro bezeroen gogobetetasuna bermatze aldera.
• EJIEko langile guztien artean konpromisoa eta erantzukizunaren zentzua sustatzea.
• EJIEko langileen gogobetetasun-maila hobetzea, hala, enpresaren politika eta helburu orokorrekiko konpromisoa lortzeko.
• Etengabeko prestakuntza sustatzea.
• Enpresa-kultura sortzea; horretarako, beharrezko baliabideak ezarriko dira langile guztiak sentsibilizatu eta prestatzeko, komunikazio- eta informazio-bide egokienak eskainiz.
• Garatutako lan-mota bakoitzeko metodologia egokiak baliatzea, langileek beren eginbeharretan erabili ahal izan ditzaten.
• Urtero kalitatearen arloko helburuak eta xedeak ezartzea, arestian aipatutako kudeaketa-politika oinarri hartuta.
• Lege eta araudi aplikagarrietako eskakizun guztiak betetzea.

EJIEk politika horren garapen egokia bermatzeko beharrezkoak diren jarduteko prozedurak eta moduak ezartzen ditu. Horiek kalitate-sistema batean islatzen dira; sistema hori dokumentatuta dago, EJIEko langile guztiek ezagutzen dute eta UNE-EN ISO (Nazioarteko Estandarizazio Erakundea) 9001:2000 Arauan ezarrita dauden eta aplikagarri diren baldintzak betetzen ditu.